नेपालको एकपछि अर्को गरी तेस्रो विजय कायम, यता समूहविजेता बन्दै क्‍वाटरफाइनलमा

एसीसी यू–१९ महिला प्रिमियर कपमा नेपालले एकपछि अर्को गरी तेस्रो विजय निकाल्दै समूहविजेता बनेर क्वाटरफाइनल प्रवेश गरेको छ ।

समूह ‘डी’ अन्तर्गत मंगलबार बिहान समापन खेलमा नेपालले हङकङमाथि १८१ रनको अर्को फराकिलो विजय हासिल गरेको हो ।

नेपालले दिएको २१२ रनको बलियो लक्ष्य पछ्याएको हङकङले पूरा २० ओभरमा ९ विकेट गुमाएर ३० रन मात्र बनाउन सक्यो ।

वोङ विङले सर्वाधिक १३ रन बनाइन् । अन्यले दोहोरो अंक छुन सकेनन् । नेपालका लागि कप्तान सोनी पाख्रिनले ४ ओभरमा ४ रन दिएर ४ विकेट लिइन् । मनिषा उपाध्यायले २ तथा कृश्मा गुरुङ र स्न्हा महराले १-१ विकेट लिए ।

त्यसअघि टस हारेर पहिले ब्याटिङको निम्तो पाएको नेपालले २० ओभरमा ६ विकेट गुमाएर २११ रन बनाएको थियो । कप्तान सोनी पाख्रिनले सर्वाधिक ९० रन बनाइन् । ६० बलमा उनले १३ चौका र १ छक्का प्रहार गरिन् । सावित्री धामीले ५२ तथा अलिशा यादवले अविजित २३ रन बनाइन् ।

नेपालले यू-१९ स्तरमा बनाएको यो दोस्रो सर्वाधिक योगफल हो भने जारी प्रतियोगिताको सर्वाधिक योगफल समेत हो । यसभन्दा अघिल्लो चरणमा सन २०२५ महिला यू-१९ टी-२० विश्वकप छनोटमा नेपालले कुवेतविरुद्ध २१३ रनको योगफल बनाएको थियो ।

हङकङका लागि निमरा अरबले २ तथा वोङ विङ र आरुज फातिमाले १-१ विकेट लिए ।

नेपालले यसभन्दा अघिल्लो चरणमा पहिलो खेलमा कतारलाई १०५ रनले अनि दोस्रो खेलमा सिंगापुरलाई १५१ रनले पराजित गरेको थियो ।