विदेशी भूमिमा पुगेर एसीसीको अन्तर्राष्ट्रिय ट्रफी जित्नु नेपालका लागि ऐतिहासिक गौरव : पारस खड्का

२९ भदौ । एसीसी प्रिमियर कपको ट्रफी जितेर एसिया कपमा छनोट भएको नेपाली क्रिकेट टोली आइतबार राति स्वदेश फर्कियो ।

टोलीको स्वागतका क्रममा नेपाल क्रिकेट संघ (क्यान) का सचिव पारस खड्काले एसिया कपमा पुग्नु नेपाली क्रिकेटका लागि गौरवको विषय भएको भन्दै यसलाई आगामी यात्राको ठूलो अवसरका रूपमा लिनुपर्ने उल्लेख गरेका छन् ।

पारसले नेपाली टोलीले प्रतियोगिताभर उत्कृष्ट क्रिकेट खेलेको उल्लेख गर्दै भारत र पाकिस्तानजस्ता बलिया टोलीसँग फेरि प्रतिस्पर्धा गर्ने अवसर मिल्नु ठूलो उपलब्धि भएको जानकारी गराए ।

‘हामी फेरि एसिया कपमा छौं भन्ने कुरामा निकै गर्व छ । टिमले राम्रो क्रिकेट खेल्यो । भारत र पाकिस्तानसँग खेलेको पछिल्लो अनुभवलाई हेर्दा यो फेरि एउटा उत्कृष्ट अवसर हो। आशा छ, यसपटक अझ राम्रो प्रदर्शन गर्नेछौं’ उनले भने।

उनले प्रिमियर कपको समूह चरणमा हङकङसँगको एक हारबाहेक नेपालले समग्रमा उत्कृष्ट प्रदर्शन गरेको पनि जानकारी गराए ।

‘क्रिकेट टिम स्पोर्ट हो । जितेपछि सबै राम्रो देखिन्छ, हार्दा आलोचना पनि स्वाभाविक हुन्छ । यद्यपि समग्रमा हाम्रो टोली सही दिशामा अघि बढिरहेको छ । हालको अवस्थामा ओडीआई संरचनामा केही सुधार गर्नुपर्ने पक्ष छन्, यद्यपि यो प्रतियोगिताको सकारात्मक पक्षबारे नै कुरा गर्नुपर्छ ।’

पारसका अनुसार मलेसियामा ट्रफी जित्नु केवल एसिया कपको टिकटमात्र होइन, एसोसियट क्रिकेटमा नेपालको स्तर प्रमाणित गर्ने उपलब्धि पनि हो।

‘नेपालभन्दा बाहिर गएर एसीसीको प्रतिस्पर्धा जित्नु आफैंमा ठूलो उपलब्धि हो । एसियामा प्रतिस्पर्धा सजिलो छैन, यद्यपि टिमले उत्कृष्ट प्रदर्शन गर्दै फेरि ट्रफी बाजि मार्यो । देशले पछिल्ला केही सातादेखि भोगिरहेको कठिन परिस्थितिबीच यो जितले नेपालीलाई केही खुसी दिएको छ’ उनले भने ।

उनले क्रिकेटमार्फत राष्ट्रलाई एकताबद्ध गर्ने अभियानमा क्यान निरन्तर लागिरहेको पनि जानकारी गराए ।

एसिया कपमा छनोटपछि नेपाली टोलीको आगामी सात–आठ महिनाको तालिका व्यस्त रहने पारसले जानकारी उपलब्ध गराए । उनका अनुसार टोलीको ध्यान अब एसियाली खेलकुद, नेपाल प्रिमियर लिग (एनपीएल), आईसीसी क्रिकेट विश्वकप लिग–२ तथा विभिन्न द्विपक्षीय शृङ्खलातर्फ केन्द्रित हुनेछ ।

‘हाम्रो अर्को बर्खासम्मकै तालिका लगभग तय भइसकेको छ । अब एसियाली खेलकुदमा पदक जित्ने अवसर छ । तत्पश्चात एनपीएल, ओडीआई क्रिकेट र द्विपक्षीय शृङ्खलाका लागि पनि पहल गरिरहेका छौं । प्रतियोगिताअनुसार सबै जानकारी सार्वजनिक गर्दै जानेछौं’ खड्काले स्पष्ट पारेका छन् ।

नेपालले एसीसी प्रिमियर कप जित्दै दोस्रो पटक एसिया कपमा स्थान सुरक्षित गरेको हो । यसभन्दा अघिल्लो चरणमा सन् २०२३ मा पनि प्रिमियर कपको ट्रफी जितेर नेपालले एसिया कप खेलेको थियो ।