‘ट्रफी जितेर मात्रै स्वदेश फर्किने संकल्प पूरा गर्यौं’ : विमानस्थल ओर्लिँदै कप्तान सन्दीप लामिछानेको प्रतिक्रिया

२९ भदौ । एसीसी प्रिमियर कपको ट्रफी जितेर आइतबार राति स्वदेश फर्किएको नेपाली क्रिकेट टोलीका कप्तान सन्दीप लामिछानेले मलेसिया जानेबेला गरेको वाचा पूरा गरेको उल्लेख गरेका छन् ।

त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै उनले मलेसियामा पुगेका नेपाली समर्थक तथा देशभरबाट साथ दिएका समर्थकलाई पनि धन्यवाद व्यक्त गरे । ‘हामी जाँदा एउटा वाचा गरेका थियौं- ट्रफी लिएर नेपाल फर्किने । आज त्यो वाचा पूरा गर्न सफल भएका छौं । यो सबै नेपाली समर्थकको माया र साथको परिणाम हो’ उनले भने ।

सन्दीपले विजय बाढीबाट पीडित सम्पूर्ण नेपालीलाई समर्पित समेत गरे । उनले कठिन समयबीच क्रिकेटले देशमा केही खुसी ल्याउन सकेको जानकारी गराए ।

‘हामी सबै खुसी छौं । देश दुःखमा रहेको बेला क्रिकेटमार्फत भए पनि नेपालीलाई केही खुसी दिन सक्यौं भन्ने लाग्छ’ सन्दीपले भने, ‘यो ट्रफी र यो उपलब्धि बाढीबाट ज्यान गुमाउने सबैप्रति श्रद्धाञ्जलीस्वरूप समर्पित छ ।’

सन्दीपले समूह चरणमा हङकङसँगको हारलाई अपवाद मान्दै प्रतियोगिताभर नेपाली टोलीले उत्कृष्ट प्रदर्शन गरेको जानकारी गराए ।

ओमानविरुद्ध १४७ रन जोगाएको खेल स्मरण गर्दै उनले त्यो स्कोर नेपालको वास्तविक क्षमता नभए पनि टोलीको सामूहिक प्रयासले विजय निकाल्न सम्भव भएको जानकारी गराए ।

‘हामीले बेसिक क्रिकेटमा फोकस गर्‍यौं । ओमानसँगको सेमिफाइनलमा त एउटा बल, एउटा क्षणलाई अन्तिम खेल जस्तो मानेर खेल्ने सोच थियो’ उनले भने, ‘प्रत्येक बलरले असाधारण प्रयास गरे, प्रत्येक खेलाडीले आफ्नो भूमिका निभाए। त्यसैले त्यो विजय सम्भव भयो ।’

‘त्यो विकेटमा १८०–२०० रन आदर्श स्कोर हुन सक्थ्यो ।  यद्यपि १४७ रन भएपछि हामीलाई थाहा थियो, दुई–तीन विकेट चाँडै निकाल्न सक्यौं भने खेलमा फर्किन्छौं । सबैले आफ्नो उत्कृष्ट दिन निकाल्नुभयो’ उनले भने ।

प्रतियोगिताको सर्वोत्कृष्ट प्रतिस्पर्धी खेलाडी घोषित भएका सन्दीपले व्यक्तिगत पुरस्कारभन्दा टोलीको सफलतालाई ठूलो उपलब्धि जानकारी गराए ।

‘यो व्यक्तिगत उपलब्धिभन्दा पनि देशको विजय हो । म्यान अफ द टुर्नामेन्ट पाउँदा खुसी लाग्छ, यद्यपि दीपेन्द्र, बशिर, गुल्शन, करण, आसिफ, रोहित सबैले उत्तिकै योगदान दिएका छन् । क्रेडिट सम्पूर्ण टोलीलाई जान्छ’ उनले भने ।

साथै उनले प्रशिक्षक, फिजियो, ट्रेनर, विश्लेषक, व्यवस्थापकदेखि सम्पूर्ण सपोर्ट स्टाफलाई ‘पर्दापछाडिका नायक’ भन्दै उनीहरूको योगदान बिना यो सफलता सम्भव नहुने उल्लेख गरे ।

सन्दीपका अनुसार नेपाली टोलीले अब छोटो विश्रामपछि पुनः गृहकार्य थालनी गर्नेछ। एसिया कपमा छनोटसँगै एसियाली खेलकुद पनि टोलीको प्रमुख लक्ष्य रहेको उनले जानकारी गराए ।

‘एक–दुई दिन आराम गरेपछि गृहकार्य थालनी हुन्छ । एसिया कप त छँदैछ, त्यसअघि एसियाली खेलकुद पनि हाम्रो ठूलो लक्ष्य हो’ उनले भने ।

नेपालले एसीसी प्रिमियर कप जित्दै दोस्रो पटक एसिया कपमा स्थान सुरक्षित गरेको हो ।