चरङ्गे युथ क्लबले हात पार्यो प्रतिष्ठित झरना रनिङ शिल्डको उपाधि

२५ असोज । रुपन्देहीको तिलोत्तमा–कुञ्जलापुरमा समापन ३८औं झरना रनिङ शिल्ड नकआउट फुटबल प्रतियोगिताको ट्रफी चरङ्गे युथ क्लब देवदहले जितेको छ ।

आइतबार उमा आधारभूत विद्यालयको खेलमैदानमा भएको फाइनलमा गोर्खा ब्वाइज क्लब बुटवललाई ३–१ गोलले पराजित गर्दै चरङ्गेले ट्रफी जितेको हो ।

उपाधिसँगै चरङ्गेले चार लाख रुपैयाँ नगद, शिल्ड र प्रमाणपत्र प्राप्त गरेको छ । उपविजेता गोर्खा ब्वाइजले दुई लाख रुपैयाँ नगद, शिल्ड र प्रमाणपत्र पाएको छ ।

प्रतियोगितामा गोर्खा ब्वाइजका विदेशी प्रतिस्पर्धी खेलाडी सिल्ला उत्कृष्ट डिफेन्डर घोषित भए । चरङ्गेका कृष्ण आले उत्कृष्ट मिडफिल्डर, भीम पुन उत्कृष्ट गोलरक्षक र अभिनास उत्कृष्ट प्रतिस्पर्धी खेलाडी बने ।

आयोजक झरना स्पोर्ट्स क्लबका दीपसन सापकोटा उदीयमान प्रतिस्पर्धी खेलाडी घोषित भए ।

विजेता तथा उपविजेता टोलीलाई तिलोत्तमा नगरपालिकाका प्रमुख रामकृष्ण खाँण, झरना स्पोर्ट्स क्लबका अध्यक्ष धनेन्द्र पौडेल र तिलोत्तमा नगर खेलकुद विकास समितिका संयोजक लोक पुनलगायतले पुरस्कार तथा प्रमाणपत्र प्रदान गरेका थिए ।