बजेटका नीतिगत व्यवस्थाहरू सकारात्मक भए पनि मुख्य चुनौती प्रभावकारी कार्यान्वयनमै छ : महासंघ अध्यक्ष

नेपाल उद्योग वाणिज्य महासंघका अध्यक्ष अन्जन कुमार श्रेष्ठले समग्र बजेटलाई हेर्दा धेरैजसो विषयलाई सम्बोधन गर्न खोजेजस्तो देखिएको टिप्पणी गरेका छन् ।

अर्थमन्त्री डा. स्वर्णिम वाग्लेले प्रस्तुत गरेको बजेटपछि सिंहरदबारमा सञ्चारकर्मीसँग प्रारम्भिक प्रतिक्रिया दिने क्रममा उनले प्रतिबद्धता कार्यान्वयनमा ध्यान दिनुपर्ने जानकारी गराए ।

उनले समग्र वार्षिक आयव्यय विवरण हेर्दा आफूहरू उत्साहित भएको भए पनि विस्तृत भने हेर्न बाँकी रहेको टिप्पणी गरे ।

‘समग्र वार्षिक आयव्यय विवरण सुन्दा हामी उत्साहित छौं । यद्यपि डिटेल्स अझै हेर्न बाँकी नै छ,’ उनले भने, ‘समग्र वार्षिक आयव्यय विवरण हेर्दा सरकारले सम्बोधन गर्न खोजेको जस्तो देखिन्छ । डिटेल्समा त अझै गएको छैन । करका दर घटाउन खोजेको जस्तो देखिन्छ ।

कृषिलाई पनि प्रोत्साहन गर्न खोजेको उनले जानकारी गराए । ‘अनुदानको नयाँ मोडालिटि पनि ल्याउन खोजेको देखिन्छ । पूर्वाधारमा थुप्रै कुरा गरेको देखिन्छ,’ उनले भने ।

अहिलेको सरकार दुई तिहाइको भएको र पहिलाका भन्दा अलि सिरियस भएर वार्षिक आयव्यय विवरण ल्याएको जस्तो उनले जानकारी गराए ।

‘यी सबै हिसाबले देख्दा सरकार पहिलाभन्दा अलि सिरियस भएर जाने र हालको अवस्थामा व्यक्त भएका प्रतिबद्धता कार्यान्वयन पक्ष पनि हेर्नुपर्नेछ,’ उनले भने, ‘सरकार पहिलाभन्दा अलि सिरियस देखिँदै जाने हो कि जस्तो देखिन्छ । विगतका सरकार मिलिजुली थियो, हालको अवस्थामा एउटै सरकारको बहुमतको अवस्था छ । यस्तो सरकारले आफूले गरेको प्रतिबद्धता पूरा गरेर लैजान्छ, देशमा शिथिल भएको अर्थतन्त्रलाई पुनर्जागरण हुन्छ भन्ने आशा तथा विश्वास गरेका छौं ।’