दुग्ध व्यवसाय प्रवद्र्धन गर्न स्याङ्जाका किसानलाई प्रतिलिटर पाँच रुपैयाँ प्रोत्साहन अनुदान

४ भदौ । स्याङ्जामा दूध उत्पादन गर्ने कृषकहरूलाई प्रतिलिटर पाँच रुपैयाँका दरले वित्तीय सहायता उपलब्ध गराइएको छ । भेटेरीनरी स्वास्थ्य संस्था तथा पशु सेवा कार्यालय स्याङ्जाले दूध उत्पादनलाई प्रोत्साहन गर्ने उद्देश्यले सहकारीमार्फत बिक्री भएको दूधको परिमाणका आधारमा कृषकहरूलाई वित्तीय सहायता दिएको हो ।

कार्यालयका अनुसार भीरकोट नगरपालिका–१ स्थित भीरकोट दुग्ध उत्पादक सहकारीमार्फत संकलन भएको एक लाख २६ हजार २९ लिटर दूधका लागि ६ लाख ३० हजार १४५ रुपैयाँ वित्तीय सहायता दिइएको छ ।

यसबाहेक, चापाकोट नगरपालिका–५ क्वामीस्थित रत्नपुर साना कृषक सहकारीमार्फत संकलन भएको ७० हजार ८१७ लिटर दूधका लागि पाँच रुपैयाँका दरले वित्तीय सहायता उपलब्ध गराइएको छ ।

कार्यालयले सार्वजनिक गरेको सूचनाका आधारमा छनोट भएका सहकारीमा आबद्ध किसानले गाई तथा भैँसीपालनबाट उत्पादन गरेको दूधमा वित्तीय सहायता दिइएको कार्यालय प्रमुख डा. रूपेश श्रेष्ठले जानकारी गराए । उनका अनुसार सहकारीका दूध संकलन केन्द्रमार्फत बिक्री भएको दूधको परिमाणलाई आधार बनाएर वित्तीय सहायता वितरण गरिएको हो ।

भेटेरीनरी स्वास्थ्य संस्था तथा पशु सेवा कार्यालयले दूधमा अनुदानसहित पशुपालन तथा उत्पादन प्रवर्द्धनका विभिन्न कार्यक्रमअन्तर्गत कुल एक करोड २८ लाख ६७ हजार २०० रुपैयाँ वित्तीय सहायता वितरण गरेको सार्वजनिक गरेको छ ।

खोरदेखि बाख्रापालनसम्म वित्तीय सहायता

वृहत्तर पशु विकास प्रवर्द्धन कार्यक्रमअन्तर्गत नयाँ खोर, तारबार, टाट्नो, बोका तथा यान्त्रीकरणका लागि विभिन्न समूह तथा सहकारीलाई वित्तीय सहायता दिइएको छ ।

कार्यालयका अनुसार कालीगण्डकी गाउँपालिका–१ र २ मा रहेको कालीगण्डकी कृषि उद्यमी महिला सहकारी संस्थालाई ८ लाख ४६ हजार ७३९ रुपैयाँ, भीरकोट नगरपालिका–२ को बलामडाँडा शान्ति कृषि तथा पशुपन्छी पालन कृषक समूहलाई ८ लाख ११ हजार ३४ रुपैयाँ, भीरकोट–३ को बानेथोक देउराली बाख्रापालन समूहलाई ८ लाख ८८ हजार ९२४ रुपैयाँ र फेदीखोला गाउँपालिका–४ को छेलो हाल्ने महिला कृषक समूहलाई ८ लाख ४२ हजार २३१ रुपैयाँ वित्तीय सहायता दिइएको छ ।

यस्तै, कालीगण्डकी करिडोरकेन्द्रित पशुपन्छी तथा मत्स्य उत्पादन तथा प्रवर्द्धन कार्यक्रमअन्तर्गत गोठ तथा भकारो सुधारका लागि पकवादी कृषि सहकारी संस्थालाई १७ लाख ४० हजार ७३० रुपैयाँ र आमा बहुउद्देश्यीय सहकारी संस्थालाई १७ लाख ६२ हजार ४४१ रुपैयाँ वित्तीय सहायता उपलब्ध गराइएको कार्यालयले सार्वजनिक गरेको छ ।

व्यावसायिक ब्लक विकास कार्यक्रमअन्तर्गत हरिनास गाउँपालिका–४, ५, ६ र ७ का लागि सूर्यमुखी बाख्रापालन तथा कृषि समूहलाई २७ लाख ८७ हजार ३०२ रुपैयाँ वित्तीय सहायता दिइएको छ ।

कार्यालयले पशुपालन तथा कृषि क्षेत्रमा विभिन्न शीर्षकमा वित्तीय सहायता दिँदै आएपनि उत्पादन र वास्तविक आवश्यकताका आधारमा वित्तीय सहायता वितरण, सहज तथा सहुलियतपूर्ण कृषि ऋण र उत्पादित वस्तुको बजार सुनिश्चितता अहिलेको मुख्य आवश्यकता रहेको सार्वजनिक गरेको छ ।