जिल्ला अस्पताल रुकुम पश्चिमको फार्मेसीको ताल्चा फोडेर औषधि र नगद चोरी

रुकुम पश्चिमस्थित जिल्ला अस्पतालको फार्मेसीमा चोरी भएको छ। जिल्लाको मुसिकोट नगरपालिका-१ सल्लेमा रहेको जिल्ला अस्पतालको फार्मेसीबाट मंगलबार राति नगद चोरी भएको जिल्ला सुरक्षाकर्मी कार्यालय रुकुम पश्चिमले जनाएको छ।

प्रहरीका अनुसार मंगलबार साँझ करिब ८ बजेतिर फार्मेसीमा कार्यरत कर्मचारी शौचालय गएको बेला काउन्टरमा रहेको नगद चोरी भएको हो। फार्मेसीबाट करिब १४ देखि १५ हजार रुपैयाँ चोरी भएको सुरक्षा संयन्त्रले जनाएको छ।

घटनापछि सुरक्षा संयन्त्रले चोरीमा संलग्न रहेको आरोपमा मुसिकोट नगरपालिका-३ का १९ वर्षीय दिपेश वली तथा मुसिकोट नगरपालिका-१ का २२ वर्षीय अल्बड सिंह र १९ वर्षीय जगदीश परियारलाई सुरक्षा नियन्त्रणमा गरेको थियो।

जिल्ला सुरक्षाकर्मी कार्यालय रुकुम पश्चिमका सूचना अधिकारी झबिन्द्र परियारका अनुसार सुरक्षा नियन्त्रणमा परेका तीनै जना शारीरिक मनस्थिति ठिक नभएका र बेवारिसे अवस्थामा सडकमा बस्दै आएका व्यक्ति हुन्। उनीहरूका अभिभावक तथा आफन्त कोही नभएका कारण उनीहरू सडकमै जीवनयापन गरिरहेका छन्।

सुरक्षा संयन्त्रले यसभन्दा अघिल्लो चरणमा पनि उनीहरूलाई विभिन्न घटनामा नियन्त्रणमा लिएको जनाएको छ। सूचना अधिकारी परियारले उनीहरूलाई सुधार केन्द्रमा राख्न आवश्यक देखिए पनि परिवारको टुंगो नलाग्दा राख्न नसकिएको जानकारी गराए ।

सुरक्षा नियन्त्रणमा परेकाहरूलाई आवश्यक सोधपुछ तथा सम्झाइ बुझाइपछि छाडिएको सुरक्षा संयन्त्रले सार्वजनिक गरेको छ । घटनाबारे थप गहन तहकिकात भइरहेको छ।