पार्टीभित्रको आन्तरिक मतभेद र तिक्तता मेट्न बृहत् मेलमिलाप आवश्यक भएको डा. शेखर कोइरालाको जोड

नेपाली कांग्रेसका नेता डा. शेखर कोइरालाले विशेष महाधिवेशनबाट सिर्जित पार्टीभित्रको तिक्तता हटाउन बृहत् एकता जरुरी रहेको उल्लेख गरेका छन् ।

गिरिजाप्रसाद कोइराला लेबर फाउण्डेशनद्वारा शुक्रबार विराटनगरमा आयोजित श्रमिकलाई व्यवसायजन्य सुरक्षा तथा स्वास्थ्यसम्बन्धी सचेतना तालिमको उद्घाटन गर्दै नेता कोइरालाले यस्तो बताएका हुन् ।

यस्तै उनले पार्टीलाई एकीकृत र संगठित बनाउन आफू लागिपरेको पनि जानकारी गराए । नेपाली कांग्रेस बलियो भएमात्रै लोकतन्त्र बलियो हुने बताउँदै उनले आफू त्यसका लागि निरन्तर प्रयासरत् रहेको पनि जिकिर गरे ।

‘हालको अवस्थामा सङ्घीय संसद्मा सङ्ख्यात्मक रूपमा कांग्रेस  कमजोर अवस्थामा रहेकाले पार्टीलाई एकढिक्का बनाएर लैजानुको विकल्प छैन,’ उनले भने ।

पार्टीमा आएको किचलो समाधानका लागि वर्तमान नेतृत्वले सबैसँग वार्ता र छलफल गरेर समाधान खोज्नुपर्ने उनले जानकारी गराए । ‘पार्टीमा के कारणले किचलो आयो ? त्यो विषयमा नेतृत्व तहले सबैसँग बसेर वार्ता एवं छलफलबाट समाधान खोज्नु जरुरी छ,’ उनले भने । –रासस