सल्यानको त्रिवेणीमा बोलेरो दुर्घटनाग्रस्त : २ जनाको ज्यान गयो, ४ जना घाइतेको उपचार जारी

२७ भदौ । सल्यानको त्रिवेणी गाउँपालिका ५ सिम्कमा बोलेरो जिप सवारी हादसा हुँदा दुई जनाको मृत्यु भएको छ भने ४ जना चोटपटक व्यहोरेका छन् ।

शनिबार बिहान सिम्कबाट लुहाम हुँदै दाङतर्फ जाँदै गरेको लु.प्र.०२-००१ ज ०००५ नम्बरको बोलेरो आफैँ अनियन्त्रित भई सडकबाट करिब ९० मिटर तल खसेर सवारी हादसा भएको हो ।

अप्रिय दुर्घटनामा परी त्रिवेणी गाउँपालिका–६ पोखरीका ८ वर्षीय रेशम बुढाथोकी र त्रिवेणी गाउँपालिका–५ सल्लेका करिब १८ वर्षीया विपना बुढाथोकीको मृत्यु भएको सुरक्षा संयन्त्रले सार्वजनिक गरेको छ ।

उनीहरूको जिल्ला स्वास्थ्य संस्था सल्यानमा उपचारका क्रममा मृत्यु भएको हो ।

घाइतेमध्ये चालक त्रिवेणी गाउँपालिका–५ सिम्कका २४ वर्षीय भुपाल पुनको अवस्था गम्भीर रहेको छ । उनको टाउकोमा चोट लागेको र बोल्न नसक्ने अवस्थामा रहेको सुरक्षा संयन्त्रले सार्वजनिक गरेको छ ।

अन्य घाइतेहरूमा त्रिवेणी–५ का २९ वर्षीय पारस बोहरा र ५० वर्षीय डिल्लीबहादुर वली तथा त्रिवेणी–६ की करिब ४२ वर्षीया लालमति बुढाथोकी रहेका छन् । उनीहरूको टाउकोमा चोट लागेको र अवस्था मध्यम रहेको छ ।

घाइतेमध्ये चार जनालाई लुहामस्थित त्रिवेणी हेल्थ केयरमा सामान्य उपचारपछि थप उपचारका लागि दाङको घोराहीस्थित राप्ती स्वास्थ्य विज्ञान प्रतिष्ठान पठाइएको जिल्ला सुरक्षाकर्मी कार्यालय सल्यानले सार्वजनिक गरेको छ ।