कैलालीमा अटो र मोटरसाइकल आपसमा जुध्दा सात जना घाइते, चारको अवस्था चिन्ताजनक

२७ असोज । कैलालीको गोदावरीमा भएको सवारी अप्रिय दुर्घटनामा परी सात जना चोटपटक व्यहोरेका छन् । उनीहरूमध्ये चार जनाको अवस्था गम्भीर रहेको छ ।

गोदावरी नगरपालिका–४ को वनदेवी मन्दिर अगाडि सुपप्र ०१००१ ह ८६३३ नम्बरको अटो र सुपप्र ०१००९ प ९३ नम्बरको मोटरसाइकल आपसमा ठोक्किएका हुन् ।

अप्रिय दुर्घटनामा परी अटो चालक गणेश आले, मोटरसाइकल चालक गोदावरी नगरपालिका–१ बस्ने निरज रावत, पछाडि सवार गोदावरी–४ लालपुर बस्ने ४६ वर्षीय भरत बुढा, अटोमा सवार चुरे गाउँपालिका–५ खानीडाँडास्थित ससुराली घर आएका ३१ वर्षीय भीमबहादुर महतरा गम्भीर घाइते गम्भीर चोटपटक व्यहोरेका छन् ।

यस्तै, चुरे गाउँपालिका–५ निवासी ४० वर्षीय चन्द्रबहादुर राना, ३० वर्षीया श्रीमती मेनुका महतरा र उनका डेढ वर्षीय छोरा रिदम महतरा पनि चोटपटक व्यहोरेका छन् ।

उनीहरूको धनगढीको निसर्ग हस्पिटलमा उपचार भइरहेको सुरक्षा संयन्त्रले सार्वजनिक गरेको छ ।

दुर्घटनाग्रस्त अटो र मोटरसाइकल सुरक्षा संयन्त्रले नियन्त्रणमा लिएको छ, भने घटनाबारे थप गहन तहकिकात भइरहेको छ ।